Entzun

Osotara berrogeita hamar bat minutuko ikuskizuna da eskaintzen duguna, hiru ataletan banatua. Atal horietako bakoitzeko zatitxo bana duzu hemen entzungai, hiru formatu ezberdinetan.

Atari garratzak ataleko demoa hemen (2:03):
mp3 (256 kbps),
mp3 (64 kbps),
ogg vorbis.

Lehendabiziko kantuak “Sion” izena du eta Hermeto Pascoal musikariarena da. Arapiraca-n jaioa eta mundu osoan ezaguna den artista poliinstrumentista da Pascoal. Nik kantu hau Toninho Ferragutti izeneko akordeoilari brasildar bati lapurtu nion, Iruñan eman zuen kontzertu batean. Oso deigarria egin zitzaidan bere estiloa eta brasildar musika tradizionala interpretatzeko bere modua, perkusio eta flauta lagun dituela. Konpositore eta musikari trebe hau tradiziotik abiatzen da bere kantuak egiteko, eta inprobisatzaile bikaina da gainera. Horretarako ondo ezagutzen dituen erritmoetatik abiatzen da: forro eta chamamea besteak beste.

Eskailera gozoak ataleko demoa hemen (2:27):
mp3 (256 kbps),
mp3 (64 kbps),
ogg vorbis.

Bigarren kantuak “Chiquilin” izena du eta Astor Piazzolla bandoneoi jole argentinarrarena da. Piazzolla AEBetara joan zen jazz ikasketak burutzera baina bertan irakasle zuenak beste norabide bat hartuarazi zion. Jazza alde batera utzi eta Argentinako tangoa oinarri hartuta bere ibilbidea hasi zuen, tango klasikoari beste forma eta armonia berriak ekarriz, nahiz honek Argentinako tangero klasikoen artean begirune handirik sortu ez. Haien ustez bere konposaketek ez zuten betiko tangoen esentzia. Hala ere mundu osoan ezaguna da Piazzolla, bai eta bere diskografia zabala ere. Mundu zabaleko edozein akordeoijoleren errepertorioan aurki dezakegu berak egindako konposizioren bat.

Eskailburu leunak ataleko demoa hemen (2:39):
mp3 (256 kbps),
mp3 (64 kbps),
ogg vorbis.

Hirugarren kantua “Sarau, o qué?” izenekoa da eta Carlinhos Antunes gitarrajole brasildarrarena da. Donostiako taberna batean zuzenean ikusteko aukera izan nuen. Astebetez izan ziren egunero bera eta beste gitarrajole brasildar handi bat, Filo Machado. Musikari trebe honekin solasteko aukera izan nuen eta umiltasun handiko gizona dela esan behar dut. Tango kutsuko kantu hau han bertan erosi nuen “Paisagem Bailarina” diskotik atera dut, eta kasualitatez kantu honetan entzuten den akordeoia Toninho Ferraguttirena dela deskubritu dut orain berri. Gurutzatu egiten diren bideak…

---