Imanol Kamiorekin hasi zituen akordeoi eta piano ikasketak, gero Juan Crisostomo Arriagan burutu zituen goi mailako ikasketak. Musika klasikoaren bidean hainbat sari jaso zituen, Montpelier eta Arrasateko txapelketetan, adibidez. Ez daki nola adierazi beste ibilbide edo eragin batzuk ere izan dituela mundu klasikotik aparte, “eskola klasikoak gauza gutxi erakutsi zidak nik orain hartutako bidean; inprobisazioan, musika modernoan, zer esanik ez musika tradizionalean”.
Kezkak ditu Txusek: “Eskola klasikoan jasotako formazioa hankamotz gelditzen duk musikari batek aurkituko duen errealitate musikaletik, beste kontzeptu desberdin bat eskeintzen dik, teknikan eta interpretazioan oinarritua. Esango nikek gure kultura musikaletik urrundu gaituela edo munduko hainbat musikaz gozatzeko ateak itxi dizkigula.
Europear musika, mundu zabaleko gainontzekoetatik ezarri egiten duk, eta gutxietsi eta baztertu egiten dizkik besteak, balio teknikoa eta estetikoa aitzakitzat hartuta. Ez duk normala XVIII. mendetik aurrerako autoreen bizitza eta obra guztia ezagutzea eta interpretatzea, eta euskal musikaren ezagutza txiki baten berri ere ez ematea.
Petrolioaren borroka balitz bezala, lurralde aberatsek bere instrumentuak martxan jarriko dizkitek bere kultura munduan zehar zabaltzeko eta besteetatik gailentzeko: Amerikako Estatu Batuetako jazzaren fenomenoa adibide bat duk. Mundu guztian erreferente duk jazza, baina ez ordea musika indua edo afrikarra.
Azkenean musikariok, gure gizartearen parte ez diren kultura konkretu batzuk lantzen pasatzen diagu gure bizitzaren parte handi bat. Eta niretzat, musika guztiak dituk interesgarri eta inor ez bestea baino hobea”.
Horregatik zalantzak ditu, ea txapelketak edo kontserbatorioko ikasketak eta gauza horiek aipatu behar ote dituen bere burua aurkezteko, besteak beste, egungo proiekzio musikala oso bide desberdina delako eta inoren laguntza gabe egindako lan sakon eta gogorraren fruitu delako.
Hortaz, geratu gara esatekotan Tapia eta Leturiarekin egin duela, musika eskolatik aparte, ibilbide musikala, 2000 urtetik laukotea osatzen duela Tapia eta Leturia eta Arkaitz Minerrekin. Québec, Italia, Argentina, Uruguay eta munduko hamaika bazterretan ibili da kontzertuak ematen, baina bertako musika eta musikariak gertutik ezagutzearen aberasgarritasuna azpimarratu nahi du esperientzia horretatik.
Joseba Tapiak bakarka hasitako bidean ere laguntzaile du Txus, “Real Politik” azken lanean teklatuak eta eskusoinua gehitzen dio Tapiaren kantuei. Zenbait parte hartze txiki ere egin ditu, han-hemen, beste hainbat musikarirekin.
No hay comentarios.:
Publicar un comentario